قصيدة ياسر التويجيري

لكم القصيدة ..

البارحـه فـي يـوم عشـره ينايـر
ثارت على الـراس المحمّـك ثوايـر
حاولـت اغيّـر فالزمـان المغـايـر
ولا حصل لي شي غيـر الـذي صـار
الله يـعـزك ياقضـيـة فلسطـيـن
من اربعينـك اليـن سبعـه وستيـن
ومـن اولـك واليـن بكـره وبعديـن
لولاك كان تضيـع نشـرات الاخبـار
حنا عـرب نعـم عـرب يـا أوربـا
ماعنـدنـا الا جـبـن والا مـربّـى
الشخـص منـنـا لاتبـيـن تغـبّـا
وهذي سياسه للهُدوْ قبـل الاعصـار
سيوفنـا وقـت المـلاقـا شطـيـره
يعني علـى ماقيـل مثـل الشطيـره
وهذا دليـل(ن) مـع نقـاء السريـره
والله يجيب الخيـر ويطيـح الامطـار
سـلام يابـوش الابــن يالمـبّـدى
ياللـي علـى كـل المبـادي تـعـدّا
طيـب .. لـو نعـم ربعـي تــردّى
وقدامـنـا جـلـه وقدامـنـا نــار
ياكندليزه رايـس اهـلا(ن) وسهلينـي
ام الجمـال اللـي يهـز السلاطـيـن
غنجك ذبح له فوق خمسـة ملاييـن
هذي ضحايـا والضحايـا بـك كثـار
فخامـت الرئيـس حسنـي مـبـارك
يحفظ جـزء عمـى وينسـى تبـارك
وأكبـر دليـل انـه يقـود المعـارك
مـو اقفـه لاجـات حـزات الاخطـار
القاهـرة بلـد حـظـاري وبـطـران
فيها البنات انـواع واشكـال والـوان
مـن هارديـز اليـن ميـدان لبنـان
وأحسن بنات اللي يجن طرق وصغـار
ورموشهن شبرين وعيونهـن سـود
وأنعم من الديباج وأرهف مـن العـود
لباس مـن حلـوى وحجّـان وخـدود
كسلات في الممشى وفي الغنج شطـار
أنا هنـا يمكـن قبـل أربـع اعـوام
رحت اتمشى عنـد هامـات الاهـرام
وركبـت مـع تكسـي وقـدام قـدام
حـتـى تعـديـنـا بـقـالـه ودوار
وجينا وأثر فيها خيـول(ن) عريبـات
أجدادها قـد شاركـت فـي الغـزوات
اجارهـا يمكـن بـاربـع جنيـهـات
وزَوّد صفـر ولاتـدقـق بالاسـعـار
أخذت لي خيـل(ن) وكربـاج وأقفيـت
يعني علـى قولـت عنيـت وتمشيـت
وياليتنـي مـع المقاديـر ماجـيـت
ولا رأيـت اللـي يهستـر بالانـظـار
فيهـا البنـات يسابقـن الرياجـيـل
اللـي عليهـم ضيّـقـات البناطـيـل
فـوق الخيـول يجاذبـن المـواويـل
مهـار لكـن فـوق قبّـات الامهـار
غازلـت لـي وحــده ولاعبرتـنـي
حلوه وفيها مـن ملامـح (برتنـي )
وأقفيت اشيل الهم مـن فـوق متنـي
عقب ماقالـت لـي حيـوان وحمـار
وأنا مانيـب انسـان واطـي وسافـل
أنـا مـن اللـي يحكمـون القوافـل
أحيـان مكفـول(ن) وأحيـان كافـل
واكره ماشوف الظلم .. والذل .. والعار
أبترك الموضـوع وأدخـل بموضـوع
دام ان صوتي عند ( الاجواد ) مسموع
نبينـا (محمـد) ولاهـوب (ياسـوع
)المصطفى الهادي شفيع(ن) للابـرار
لو انتحـر صـدام مـن قبـل ينهـان
وخلاّ المشاكـل كلهـا فـوق بـرزان
مكان مصخر به قـدم كـل الاعيـان
عزيـز قـوم(ن) ذل بيديـن الاقـدار
(سبيس تون) ان كان في الناس حيـره
أفضـل بواجـد مـن قنـاة الجزيـره
تضحّـك الورعـان وقـت الظهيـره
وهـذي تبكينـا اليـا جـات الاخبـار
ختامهـا مـدري وش اقـول لـكـن
ماحب انا أسمـع اغنيـة (الاماكـن )
من ثقل همن بيـن الاضـلاع ساكـن
الله يحرول ساق رجلـي عـن البـار